अॅड गुणरत्न सदावर्ते यांना मोठा दणका ! २ वर्षांसाठी सनद रद्द; कारवाईमागच कारण काय?
लोकवेध live न्यूज
एसटी कर्मचाऱ्यांच्या आंदोलनामुळे चर्चेत आलेले वकील गुणरत्न सदावर्ते यांना महाराष्ट्र-गोवा बार कौन्सिलने मोठा धक्का दिला आहे. महाराष्ट्र-गोवा बार कौन्सिलने गुणरत्न सदावर्ते यांची वकिलीची सनद दोन वर्षांसाठी रद्द केली आहे. अॅड. सुशील मंचरकर यांच्या तक्रारीनंतर बार कौन्सिलने हा निर्णय दिला. गुणरत्न सदावर्ते यांच्यावर वकिलांच्या आचारसंहितेचं उल्लंघन केल्याचा आरोप ॲड. सुशील मंचरकर यांनी केला होता. यासंदर्भातील तक्रार त्यांनी महाराष्ट्र-गोवा बार कौन्सिलकडे केली होती. त्यानंतर महाराष्ट्र बार कौन्सिलने सदावर्तेंविरोधात शिस्तभंगाची कारवाई सुरू केली.
महाराष्ट्र आणि गोवा बार कौन्सिलने अॅड. गुणरत्न सदावर्ते यांची वकिलीची सनद दोन वर्षांसाठी निलंबित केली आहे. त्यांनी वकिली आचारसंहितेचे उल्लंघन करुन वकिली गणवेशामध्ये आंदोलनात भाग घेतल्याने त्यांच्यावर ही कारवाई करण्यात आली. त्यामुळे गुणरत्न सदावर्ते आता २ वर्षांसाठी कोणत्याही न्यायालयात वकिली करु शकणार नाहीत किंवा कोणाचीही बाजू मांडू शकणार नाही.
वकिलांच्या गणवेशात सार्वजनिक ठिकाणी आंदोलन केल्याचा ठपका अॅड. गुणरत्न सदावर्ते यांच्यावर ठेवण्यात आला आहे. म्हणून त्यांच्यावर शिस्तभंगाची कारवाई करण्यात आली. त्यांच्या विरोधात २ तक्रारी दाखल करण्यात आल्या होत्या. यापैकी पिंपरी चिंचवडमध्ये झालेल्या आंदोलनावरून त्यांच्यावर कारवाई करण्यात आल्याचे सांगण्यात येत आहे. महाराष्ट्र आणि गोवा बार कौन्सिल या निर्णयाला अॅड. गुणरत्न सदावर्ते आव्हान देणार असल्याची माहिती देण्यात येत आहे.