आईचे कष्ट बघून काळीज तुटलं ; पालघरमध्ये 14 वर्षाच्या मुलाने घराबाहेर खोदली विहीर
पालघर : लोकवेध live न्यूज
आपल्या आईला लांबवर अंतरावर जाऊन पाणी आणावे लागत होते. ते बघून मुलाचा जीव तीळ तीळ तुटत असे ते बघून मुलांनी असे काही करायचे ठरवले की ते बघून सर्वांनी आश्चर्याने तोंडात बोटे घातली. पालघर तालुक्यातील केळवे धावांगे पाडा येथील प्रणव रमेश सालकर या नववी इयत्तेतील, १४ वर्षीय मुलाने स्वतःच्या अंगमेहनतीने घराच्या परिसरात खड्डा खोदत खोदत विहीर खोदली आहे.
केळवे गावात धावांगे पाडा हा ६०० ते ७०० लोकवस्तीचा पाडा आहे. खाजण जमिनीचा भाग असल्याने येथील विहीर व बोरिंगला खारट पाणी येते. त्यामुळे या पाड्याला पाण्याची कायमच चणचण भासते. केळवे गावाला महाराष्ट्र ग्रामीण पाणीपुरवठा योजनेंतर्गत पाणी पुरवले जात असले, तरी नळाला आठवड्यातून रविवार, मंगळवार व गुरुवारी असे तीन दिवसच पाणी येते.
प्रणवची आई दर्शना व वडील रमेश हे बागायती शेतीवर शेतमजूर म्हणून काम करतात. दर्शना मजुरी करून थकून घरी आल्यानंतर पाण्यासाठी त्यांना अर्धा किलोमीटर लांब जावे लागत होते. आईचे कष्ट बघवत नसल्याने प्रणवने विहीर खोदण्याचा निर्धार केला. घराच्या अंगणात त्याने पहारीने खड्डा खोदायला सुरुवात केली. दररोज थोडाथोडा खड्डा खोदून, सुमारे १२-१५ फूट खोल खड्डा केल्यानंतर त्याला गोड पाणी लागले.
खड्डा खोदण्यासाठी प्रणवने अथक परिश्रम घेतले. खड्ड्यातून माती काढण्यासाठी त्याने स्वतःहून शिडी बनवली व त्याद्वारे तो माती खणून वर आणून टाकत होता. खड्डा खोदताना दगडही लागले; मात्र वडिलांच्या सहकार्याने त्याने हे दगडही फोडले. खोदता खोदता अखेर पाणी लागले आणि त्याची मेहनत फळास आली. त्यामुळे आईला लावून पाणी आणावे लागत असे त्याचा ताण च गेला.