साकुरमध्ये पेट्रोल पंपावर सशस्त्र दरोडा; पिस्तूलाच धाक दाखवून कर्मचाऱ्यास लुटले तर घारगावमध्ये मारहाण करुन दुकानदाराला लुटले

याबाबत माहिती अशी की, साकुर परिसरात मांडवे रस्त्यावर आदिक खेमनर यांच्या मालकीचा भगवान पेट्रोलियम हा पेट्रोल पंप आहे. दरम्यान नेहमीप्रमाणे रविवारी दिवसभर पेट्रोल पंप सुरू होता. रात्री काम आटोपून पंप मॅनेजर दत्ता शेंडगे हे घरी गेले. तर यावेळी सुनील गिरे व विलास कातोरे हे दोघे कर्मचारी तेथे काम पहात होते. रात्री 10.45 च्या सुमारास हे दोघे कर्मचारी दिवसभराचा हिशेब करीत असताना दोन दुचाकीवरून तीन तरूण तोंड बांधून पेट्रोल भरण्यासाठी आले असता विलास कातोरे हे त्यांना पेट्रोल देण्यासाठी बाहेर गेले. पेट्रोल भरल्यानंतर हे तरुण पैसे न देता थेट या पंपाच्या कॅबीनमध्ये घुसले. यावेळी ता तिघांपैकी एकाने थेट बंदुक काढून सुनील गिरे यांच्यावर रोखत पैसे काढून देण्याचा इशारा केला. पैसे न दिल्यास जीवे मारण्याची धमकी दिली. त्यामुळे भेदरलेल्या या कर्मचाऱ्यांनी कोणताही विरोध न केल्याने या दरोडेखोरांनी येथील सुमारे 2 लाख 50 हजार 747 रूपयांची रोकड लुटून नेली

 हे दरोडेखोर तेथून निघून गेल्यावर या घाबरलेल्या कर्मचाऱ्यांनी आरडाओरडा केल्याने आजूबाजूचे नागरिक मदतीला धावून आले मात्र तोपर्यंत हे चोर पसार झाले

  याबाबत सुनील गिरे यांनी घारगाव पोलीस ठाण्यात फिर्याद दिली.

दरम्यान या पेट्रोल पंपावर दरोडा पडण्यापूर्वी याच दरोडेखोरांनी घारगाव बसस्थानकाजवळ असणाऱ्या लक्ष्मी टायर वर्क्स या दुकानाचे मालक अनुदेव अनंत ओंदुशेरी यांच्या दुकानात घुसून या दरोडेखोरांनी त्यांच्या खिशातील सर्व रोकड, दोन मोबाईल व त्यांची मोटारसायकल क्रमांक एम. एच. 17 सी ए7207 ही गाडी पळवून नेली. या चोरीला विरोध केल्याने चोरट्यांनी या दुकान मालकावर चाकूने हल्ला करत त्यांना गंभीर जखमी केले. याच गाडीचा वापर पुढे साकुर येथील दरोड्यात करण्यात आला. एकाच वेळी या तीन अज्ञात दरोडेखोरांनी दोन ठिकाणी दरोडा टाकत लाखो रुपयांचा ऐवज लुटून नेला. याप्रकरणी पुढील तपास घारगाव पोलीस करत आहेत.

या प्रकरणी घारगाव पोलीस ठाण्यात गुन्हा दाखल करण्यात आला असला तरी मागील काही दिवसात या पठार भागात चोरी, दरोड्याच्या अनेक घटना घडल्या असताना यातील एकाही गुन्ह्याचा तपास लावण्यात धारगाव व संगमनेर पोलीस अपयशी ठरले आहे. पुणे पोलीस पठार भागात येऊन चोर, दरोडेखोरांच्या मुसक्या आवळीत असले तरी येथील पोलीस मात्र हातावर हात धरून बसले आहे. पोलीसांच्या या भुमिकेमुळे मात्र येथील

नागरिक मात्र पुरते हादरून गेले आहे.

पेट्रोल पंपावर सशस्त्र दरोडा; पिस्तूलाच धाक दाखवून कर्मचाऱ्यास लुटले