पंचवीस वर्षांनी पुन्हा भरला मैत्रीचा वर्ग’; विश्वरुपी माध्यमिक विद्यालयाच्या २०००-०१ च्या माजी विद्यार्थ्यांचा स्नेहमेळावा उत्साहात*

*’पंचवीस वर्षांनी पुन्हा भरला मैत्रीचा वर्ग’; विश्वरुपी माध्यमिक विद्यालयाच्या २०००-०१ च्या माजी विद्यार्थ्यांचा स्नेहमेळावा उत्साहात*

अंबाजोगाई / सुरेश मंत्री 

“शाळा सुटते, शिक्षण पूर्ण होते; पण मैत्रीची घंटा कधीच थांबत नाही…” या भावनेचा प्रत्यय देणारा तालुक्यातील देवळा येथील विश्वरुपी माध्यमिक विद्यालयातील इयत्ता दहावी (शैक्षणिक वर्ष २०००-२००१) च्या माजी विद्यार्थ्यांचा भव्य स्नेहमेळावा रविवारी (दि. १२ जुलै) विद्यालयाच्या प्रांगणात अत्यंत उत्साहपूर्ण आणि भावनिक वातावरणात संपन्न झाला.

तब्बल पंचवीस वर्षांनंतर एकाच वर्गातील मित्र-मैत्रिणी पुन्हा एकत्र आल्याने परिसरात आनंद, उत्साह आणि आठवणींचा दरवळ अनुभवायला मिळाला. शालेय जीवनातील खोडकर प्रसंग, शिक्षकांचे मोलाचे संस्कार, अभ्यासासोबतच अनुभवलेले अविस्मरणीय क्षण आणि आयुष्याला दिशा देणाऱ्या त्या सुवर्ण दिवसांच्या आठवणींनी अनेकांच्या डोळ्यांच्या कडा नकळत ओलावल्या.

स्नेहमेळाव्याच्या अध्यक्षस्थानी विद्यालयाचे मुख्याध्यापक शाहू खोसे, प्रमुख पाहुणे म्हणून श्री दत्त माध्यमिक विद्यालयाचे मुख्याध्यापक भागवत हावळे तर प्रमुख मार्गदर्शक म्हणून ज्येष्ठ विचारवंत डॉ. मुकुंद राजपंखे उपस्थित होते.

कार्यक्रमाची सुरुवात दीपप्रज्वलन व सरस्वती पूजनाने झाली. उपस्थित मान्यवरांचे पुष्पगुच्छ देऊन स्वागत करण्यात आले. यानंतर माजी विद्यार्थ्यांनी शिक्षकांचा सत्कार करून त्यांच्या ऋणाबद्दल कृतज्ञता व्यक्त केली. “आज आम्ही ज्या ठिकाणी आहोत, त्यामागे या विद्यालयाने दिलेले शिक्षण, संस्कार आणि शिक्षकांचे मार्गदर्शन आहे,” अशा भावना अनेकांनी यावेळी व्यक्त केल्या.

मार्गदर्शन करताना डॉ. मुकुंद राजपंखे म्हणाले, “माणसाच्या आयुष्यातील सर्वात सुंदर आठवणी या शालेय जीवनाशी जोडलेल्या असतात. शिक्षणाबरोबरच माणुसकी, शिस्त आणि सामाजिक जाणिवा देणारी शाळा ही प्रत्येकाच्या आयुष्याची खरी पायाभरणी असते. माजी विद्यार्थ्यांनी विद्यालयाशी असलेले हे ऋणानुबंध अधिक दृढ करत समाजहितासाठीही योगदान द्यावे.”

अध्यक्षीय समारोपात शाहू खोसे यांनी माजी विद्यार्थ्यांच्या या स्तुत्य उपक्रमाचे कौतुक करत, विद्यालयाच्या विकासासाठी सर्वांनी एकत्रितपणे कार्य करण्याचे आवाहन केले. प्रमुख पाहुण्यांनीही अशा स्नेहमेळाव्यांमुळे मैत्रीचे बंध अधिक दृढ होतात आणि नवीन पिढीला प्रेरणा मिळते, असे मत व्यक्त केले.

“जुन्या वहीतील अक्षरे आजही तितकीच जिवंत आहेत,
मैत्रीच्या पानांवर काळालाही पुसता न आलेल्या आठवणी कोरलेल्या आहेत.”

या काव्यपंक्तीप्रमाणेच हा स्नेहमेळावा केवळ भेटीगाठींचा कार्यक्रम न राहता, संस्कार, स्नेह, कृतज्ञता आणि जिव्हाळ्याच्या नात्यांचा अविस्मरणीय उत्सव ठरला. शेवटी सर्व माजी विद्यार्थ्यांनी पुन्हा अशाच स्वरूपात भेटण्याचा संकल्प व्यक्त केला. कार्यक्रमाच्या यशस्वी आयोजनासाठी २०००-२००१ च्या माजी विद्यार्थ्यांनी परिश्रम घेतले. सूत्रसंचालन, नियोजन आणि स्नेहभोजनामुळे कार्यक्रमाला अधिक रंगत आली.