गौतमी पाटील सारखीच लावणी हवी’…  ग्रामीण भागात अस्सल लोककलेला फटका

लावणी कशी असते

नृत्य, संगीत आणि अभिनयाचे सुंदर सादरीकरण म्हणजे ‘लावणी’.  लावणीमध्ये ढोलकी आणि तुणतुणे या वाद्याचा साथीने सादर केली जाते. मराठी लोकनाट्याच्या विकासासाठी लावणीचे मोठेच योगदान आहे. लावणीत शृंगार आहे, लटका राग आहे, आग्रह आहे, स्तुती आहे, वर्णन आहे, संवाद आहे, रुसवा आहे, प्रीत आहे. ढोलकीवर थाप, घुंगरांची साथ आहे. मार्मिक विनोदाने प्रेक्षकाने हसवण्याची ताकद आहे. 

गौतमी पाटीलमुळे  तमाशासमोर नवं संकट

गौतमी पाटील महाराष्ट्रभर प्रसिद्ध झाली असली तरी तिच्या कार्यक्रमांमुळे आता महाराष्ट्रातील अस्सल तमाशासमोर नवं संकट उभं राहिलं आहे. गौतमी पाटील ज्या पद्धतीने लावणी सादर करते तशाच लावणीची मागणी आता प्रेक्षकांकडून होत आहे. लोकांना ढोलकीची थाप नको तर डीजेच्या तालावर नाचायचं आहे. पण यामुळे तमाशाची कला लोप पावेल अशी भीती तमाशा परिषदेचे अध्यक्ष रघुवीर खेडकर यांनी व्यक्त केली आहे. 

तमाशा तमाशा सारखाच चालु द्या

गौतमी पाटील ज्या प्रकारे कार्यक्रम करते, तो प्रकार चांगला नाही. गावकऱ्यांनी स्टेज बांधायचा, गावकऱ्यांनीच डीजे आणायचा, गावकऱ्यांनी लाईटिंग लावायची. गौतमी पाटील चार मुली घेऊन येते आणि डीजेवर नाचते. डीजेच्या तालावर पोरंही नाचतात. आता तोच प्रकार तमाशात व्हावी अशी अपेक्षा प्रेक्षक करु लागले आहेत. लोकं म्हणतायत, गणगवळण नको, तुमचे विनो नको, फक्त डीजेवर गाणी लावा. पण तमाशा असा चालणार नाही. तमाशाची कला लोप पावेल अशी खंत रघुवीर खेडकर यांनी व्यक्त केलीय. तमाशा तमाशा सारखाच चालु द्या, तमाशाचा गौतमी पाटील होऊ देऊ नका, अशी विनंतही खेडकर यांनी व्यक्त केलीय.