🌸 शाडूच्या बाप्पामध्ये पर्यावरणप्रेम – विद्यार्थ्यांच्या हातांनी साकारले बाप्पा 🌸

🌸 शाडूच्या बाप्पामध्ये पर्यावरणप्रेम – विद्यार्थ्यांच्या हातांनी साकारले बाप्पा 🌸

अंबाजोगाई  / लोकवेध live न्यूज 

गणेशोत्सव म्हणजे श्रद्धा, आनंद आणि परंपरेचा मान! परंतु या परंपरेसोबत पर्यावरणाचेही रक्षण व्हावे, या उदात्त हेतूने श्री. खोलेश्वर माध्यमिक विद्यालयात दरवर्षीप्रमाणे याही वर्षी दोन दिवसीय पर्यावरणपूरक गणेशमूर्ती कार्यशाळा उत्साहात संपन्न झाली.

या कार्यशाळेच्या उद्घाटन प्रसंगी शालेय समितीचे अध्यक्ष डॉ. अतुल देशपांडे अध्यक्ष स्थानी होते. प्रमुख पाहुणे म्हणून कलाध्यापक विद्याधर पंडीत सर व स्थानिक समन्वय समितीचे कार्यवाह किरणदादा कोदरकर उपस्थित होते. शाळेचे मुख्याध्यापक अनंतराम कोपले सर, उपमुख्याध्यापक शैलेश कंगळे सर, पर्यवेक्षक प्रशांत पिंपळे यांच्यासह शिक्षकवृंदाने उपस्थिती लावली.

कलाध्यापक विद्याधर पंडीत व उमेश डोंगे यांनी विद्यार्थ्यांना प्रत्यक्ष मार्गदर्शन केले. पहिल्या दिवशी “गणेशमूर्ती कशी घडवावी?” या विषयावर उमेश डोंगे सरांनी प्रभावी प्रास्ताविक केले. त्यांनी सांगितले, “गणपती बाप्पा आपलेही, निसर्गाचाही बाप्पा आपलाच! शाडू मातीच्या मूर्ती पाण्यात सहज विरघळून निसर्गाचे रक्षण करतात, तर प्लॅस्टर ऑफ पॅरिसच्या मूर्ती प्रदूषण निर्माण करतात. म्हणूनच प्रत्येक घराघरात इको-फ्रेंडली बाप्पाचे आगमन व्हावे.”

या कार्यशाळेत तब्बल १७० विद्यार्थ्यांनी सहभाग नोंदवून बॉम्बे क्लेपासून सुंदर गणेशमूर्ती साकारल्या. लहानग्या विद्यार्थ्यांच्या सर्जनशीलतेला उधाण आले होते. त्यांच्या नाजूक हातांनी घडवलेल्या शाडूच्या बाप्पांमध्ये भक्तिभावासोबत पर्यावरणप्रेमही दिसून येत होते.

या उपक्रमाच्या यशस्वी आयोजनासाठी मुख्याध्यापक अनंतराम कोपले, उपमुख्याध्यापक शैलेश कंगळे, पर्यवेक्षक सूर्यकांत उजगरे व प्रशांत पिंपळे, अभ्यासपूरक मंडळ प्रमुख श्रीकांत देशपांडे, कलोपासक मंडळ प्रमुख अनुराधा रंजनकर तसेच सर्व शिक्षक व शिक्षकेत्तर कर्मचारी यांनी परिश्रम घेतले.

या आगळ्या-वेगळ्या कार्यशाळेमुळे विद्यार्थ्यांमध्ये “गणपती बाप्पा मोरया… पर्यावरणपूरक बाप्पा मोरया” असा संकल्प दृढ झाला.