राज्यात ‘या’ ठिकाणी शेतकऱ्याने ‘कांद्याची होळी’ जाळून संताप व्यक्त केला आहे.
मंडईंमध्ये शेतकऱ्यांना केवळ 1 ते 2 रुपये किलो कांद्याचा भाव मिळत आहे.
संगमनेर लोकवेध live न्यूज
राज्यात सध्या शेतकऱ्यांना दुहेरी फटका बसत आहे. एकीकडे हवामानात होणाऱ्या बदलामुळे पिकांचे नुकसान होत आहे तर दुसरीकडे राज्यात कांद्याच्या दरात मोठी घसरण झाल्याने शेतकरी नाराज झाले आहेत.यामुळे आता नाशिक जिल्ह्यातील शेतकरी चांगलेच आक्रमक झाले आहे. नाशिक जिल्ह्यातील येवला तालुक्यात राहणाऱ्या कृष्णा डोंगरे या शेतकऱ्याने ‘कांद्याची होळी’ जाळून संताप व्यक्त केला आहे. डोंगरे सांगतात की, सध्या बाजारात कांद्याचा भाव एक रुपये किलो आहे. एवढा भाव पडल्याने शेतकरी निराश झाला आहे.
कांदा पिकाचे झालेले नुकसान पाहून शेतकऱ्यांच्या डोळ्यात अश्रू तरळले, लहान मुलांप्रमाणे जपलेले पीक आज जाळावे लागत असल्याचे ते सांगतात. काही दिवसांपूर्वी नाशिक जिल्ह्यातील एका शेतकऱ्याने त्याच्या चार एकरातील रब्बी हंगामातील कांद्याचे पीक ट्रॅक्टर चालवून नष्ट केले होते. हताश झालेल्या शेतकऱ्याने सांगितले की, बाजारात उपलब्ध असलेल्या एक रुपयाच्या भावामुळे आपण चिंतेत आहोत, त्यामुळे कांद्याचे पीक जमिनीत मिसळून दुसरे पीक घेण्यास सुरुवात केली. कांद्याचे भाव घसरल्याने राज्यातील अनेक शेतकरी आर्थिक संकटात सापडले आहेत.
120 क्विंटल कांदा जाळून सरकारचा निषेध
येवला तालुक्यातील शेतकरी कृष्णा डोंगरे यांनी संवाद साधताना सांगितले की, त्यांनी दीड एकरात कांद्याची लागवड केली असून, त्यासाठी 1 लाख 25 हजार रुपये खर्च आला आहे. मात्र बाजारात केवळ एक रुपये किलोचा भाव मिळतो. यामुळे निराश होऊन कांद्याचे पीक जाळून टाकण्याचा निर्णय घेतला. याआधी शेतकऱ्याने स्वत:च्या रक्ताने निमंत्रण पत्र बनवून मुख्यमंत्री एकनाथ शिंदे यांच्यासह अनेक मंत्र्यांना पाठवून 15 दिवसांची मुदत मागितली होती. मात्र सरकारकडून प्रतिसाद मिळाला नाही. शेतात विविध ठिकाणी 120 क्विंटल कांदा जाळून सरकारचा निषेध केल्याचे शेतकरी कृष्णा डोंगरे यांनी सांगितले.
शेतकरी सातत्याने आंदोलन करत आहेत
संपूर्ण आशिया खंडात नाशिक जिल्हा कांद्याची बाजारपेठ म्हणून ओळखला जातो. मात्र येथील शेतकरी कांद्याच्या घसरलेल्या भावाने हैराण झाले आहेत. राज्यातील अनेक मंडईंमध्ये शेतकऱ्यांना केवळ 1 ते 2 रुपये किलो कांद्याचा भाव मिळत आहे. अशा स्थितीत शेतकरी अडचणीत सापडला आहे.
कांद्याचे भाव वाढवून निर्यात लवकरात लवकर सुरू करावी, अशी मागणी गेल्या काही दिवसांपासून शेतकरी सरकारकडे करत आहेत. गेल्या आठवड्यात लासलगाव बाजार समितीत कांदा उत्पादक शेतकऱ्यांनी कांद्याचे लिलाव बंद पाडले होते. सरकारकडे कांद्याला प्रतिक्विंटल 1500 रुपये अनुदान देण्याची मागणी शेतकरी करत आहेत.