एकादशीनिमित्त गगनगिरी महाराज हरिनाम सप्ताहात भक्तीचा महासागर; होम-हवन, मातृ-पितृ पूजन व कीर्तनाने भाविक मंत्रमुग्ध
ह.भ.प. विशाल महाराज खोले यांचे सुश्राव्य कीर्तन
संगमनेर
परमपूज्य स्वामी गगनगिरी महाराज अखंड हरिनाम सप्ताह पर्व आठवे सध्या अत्यंत भव्य-दिव्य आणि भक्तिमय वातावरणात सुरू असून एकादशीच्या पावन पर्वानिमित्त सप्ताह स्थळी विविध धार्मिक कार्यक्रमांचे आयोजन करण्यात आले. दिवसभर सुरू असलेल्या आध्यात्मिक उपक्रमांमुळे संपूर्ण परिसर भक्तिरसाने न्हाऊन निघाला होता.
एकादशीच्या निमित्ताने सकाळी विधिवत होम-हवन करण्यात आले. त्यानंतर भारतीय संस्कृतीतील माता-पित्यांचे महत्त्व अधोरेखित करणारा मातृ-पितृ पूजन सोहळा मोठ्या उत्साहात संपन्न झाला. या सोहळ्यात सहभागी झालेल्या भाविकांनी आपल्या आई-वडिलांप्रती कृतज्ञता व्यक्त करत त्यांचे पूजन केले. यावेळी उपस्थितांना संस्कार, कुटुंबव्यवस्था आणि अध्यात्म याविषयी मार्गदर्शन करण्यात आले.
त्यानंतर आयोजित व्याख्यानातून धर्म, संस्कार आणि समाजप्रबोधनाचे महत्त्व विशद करण्यात आले. दुपारच्या सत्रात ह.भ.प. विशाल महाराज खोले यांच्या सुश्राव्य कीर्तनाने उपस्थित भाविकांना भक्तीच्या सागरात नेले. आपल्या ओजस्वी वाणी, रसाळ निरूपण आणि हरिनामाच्या महिम्याने त्यांनी उपस्थितांना मंत्रमुग्ध केले. कीर्तनादरम्यान टाळ-मृदंगाच्या गजरात संपूर्ण परिसर भक्तिमय झाला होता.
एकादशीच्या पावन दिवशी सप्ताह स्थळी आलेल्या हजारो भाविकांसाठी दिवसभर खिचडी महाप्रसादाचे वाटप करण्यात आले. भाविकांनी मोठ्या श्रद्धेने महाप्रसादाचा लाभ घेतला. सप्ताहाच्या प्रत्येक दिवशी भाविकांची वाढती उपस्थिती आणि धार्मिक कार्यक्रमांना मिळणारा उत्स्फूर्त प्रतिसाद यामुळे या सप्ताहाचे महत्त्व अधिकच वाढत आहे.
सप्ताहाच्या यशस्वी आयोजनासाठी कार्यरत असलेले आयोजक, स्वयंसेवक आणि ग्रामस्थ उत्कृष्ट नियोजन करीत असून भाविकांच्या सुविधा, महाप्रसाद व्यवस्था आणि धार्मिक कार्यक्रमांचे व्यवस्थापन आदर्शवत होत आहे. दिवसेंदिवस वाढणारी भाविकांची गर्दी आणि भक्तीमय वातावरणामुळे हा सप्ताह संपूर्ण परिसरासाठी श्रद्धा, संस्कार आणि अध्यात्माचे प्रेरणास्थान ठरत आहे.